මිනිසකු පිට නැගී අසරුවෙකි
ඒ බර ගෙයි වහලට බරකි
පාන්දරින් පැරදුන ඒ මිනිහා
හැන්දෑවෙත් යලි අසු පිටට නගී....

හෙට මම ගෙදරට සුර සැප දෙනවා
අද රෑ ලුණුමිරිසෙන් ගතවෙනවා
කාසි මල්ල සතෙකුගේ පිට යනවා 
දු දරුවන් පැදුරේ නිදියනවා....

ඉරණම විසදුම සතෙකුට දෙනවා
තිරිසනෙකුට මිනිසකු පරදිනවා
දරුවන් බිරිදත් ගිනි උහුලනවා
හීනෙන්  නුබ තව ගෙවල් හදනවා 

 ගායනය : සුනිල් එදිරිසිංහ

" යදමින් බැද විලංගු ලා
මගේ පුතා රැගෙන යන්න...
ඉදිකටු ඇන ඇඟිලි තලා
දෙතිස් වදය පමුණුවන්න...
අලුත් ලොවක් ගැන සිතීම
දඩුවම් දෙන වරද නම්,
කුමට එරට අධිකරණය, නීතිය සහ විනිසුරන්..."

" කකා බිබී නටන අතර
නරුම යහළු යෙහෙලියන්...
පන්දු කෙලින අතර ඉහල
පාසල් වල අමනයන්...
රට ගිනිගෙන ඇති බව දුටු
මගෙ එකම පුතුනුවන් !
එගිනි නිවන මග සෙවීම,
වරදක් දැයි මට කියන්..."

" ගිනි ගන්නා රටක් කෙලින
මී හරකුන් වැනි පුතුන් !
කුමටද මට මහ විරුවෙකි.
සිරගෙයි මල මගේ පුතුන්...
කෝටි ගණන් බිහි වේවා...!
මගේ පුතු වැනි තව පුතුන්.
කිරි මව් ලෙස මම ඉන්නම්.
එවන් පුතුන් ලඟ උතුම්..."

- නන්දා මාලිනියන් -